БҚО жастар саясаты мәселелері басқармасының қолдауымен ұйымдастырылып жатқан «Жастар керуені» жобасы Қаратөбе ауданымызда болып, ауыл жастарының тыныс-тіршілігімен танысты.

Ауыл жастарының әлеуетін арттыру, жастарға арналған мемлекеттік бағдарламалардың артықшылықтары мен мүмкіндіктерін түсіндіру мақсатында қолға алынған жоба аясында алдымен түрлі сала мамандары аудан жастарымен кездесіп, өз ойларымен бөлісті. 

Жоба еріктілері ең бірінші кезекте әр ауданның ауыл округтық жастарымен түрлі сала мамандары кездесіп, қазіргі таңдағы әртүрлі бағыт бойынша мүмкіндіктерді түсіндіріп, жаңа жобалар жөнінде ақпараттар берілді. Шараның екінші бөлімінде «Business Power» жобасының авторы, жеке кәсіпкер Айнаш Бижанова кәсіпкерлікті дамыту бойынша кеңестер берді. Команда жасақтау, топпен жұмыс жасауды үйрету мақсатында психолог Нұргүл Елеуова, дебат ойындарын дамыту, жастарды шешен сөйлеуге үйрету мақсатында облыстық «Ақиқат» пікір-сайыс орталығының ойыншылары Гүлбағым Ниязбаева семинар-тренинг өткізді.Сонымен қатар, мамандар би өнері және фристайлдан шеберлік сағаттарын көрсетті.

– Жобаның негізгі міндеттері ауыл жастарымен, түрлі саланың мамандарымен кездесу өткізу және мотивациялық диалогты қалыптастыру, жастарға арналған мемлекеттік бағдарламаларды түсіндіру және оларды жетілдіруге байланысты олардың ұсыныс-тілектерін қабылдау, жас өнерпаздардың қатысуымен мерекелік концерт ұйымдастыру болып табылады.

Жоба бір ай бұрын Қазталов, Жәнібек, Бөкей орда мен Жаңақала аудандарында өтті. Тамыз айының он бесінен басқа аудандарда өз жұмысымызды жалғастырудамыз. Жоба Бәйтерек ауданында қорытындыланады. Бұл өткізіліп жатқан шаралардың мақсаты ауыл жастарының белсенділігін арттыру болып табылады.

Жоба биыл алғаш рет қолға алынып отыр, сол себепті де барлық өңірлерде бірдей деңгейде өтіп жатыр айта алмаймын. Бірақ алдағы уақытта үлкен қолдауға ие болады деп сенеміз, - дейді «Жас Отан» жастар қанаты облыстық филиалының менеджері Жандос Сұңғатов.

Семинар-тренинг облыс өнерпаздарының концерттік бағдарламасына ұласты. «Жастар керуені» жобасының жастарға берері көп болды. Алайда осындай шараларда аудиторияның болмауы қынжылтады. Алдағы уақытта ұйымдастырушылар аудандағы жұмыссыз жастарды пайдалы шараларға қатыстырса дейміз.